Ikibazo Imana ifitanye n’abigisha igice cya cumi na karindwi
Nubwo ibyo ukora bifitiye umumaro abandi ntibivuzeko bizakugeza ku ntego zawe
Kugira ngo wumve ino nkuru neza, biragusaba gusoma igice cya 16 kuko ino nkuru ishamikiye kuri icyo gice.
Mose amanika ukuboko akubita icyo gitare inkoni ye kabiri, kivusha amazi menshi iteraniro riranywa, ryuhira n’amatungo yaryo. Uwiteka abwira Mose na Aroni ati “Kuko mutanyizeye ngo mwerekanire kwera kwanjye mu maso y’Abisirayeli, ntimuzajyana iri teraniro mu gihugu mbahaye.” (Kubara 20:11-12).
Intego ya Mose yari ukugera I Kanani nk'uko Imana yari yarabimusezeranije (Kuva 3:7-8; 12; 6:6-8), uwabona Mose akubise inkoni urutare rukavusha amazi yanezezwa cyane no kuba afite umuyobozi mwiza ubagirira umumaro akabaha ibyo bakennye, ariko mu mutima Imana ivuga iti: nubwo ushimwa n’abantu ariko ijuru ntirigushima. Nubwo ibyo nashakaga ko ukora byakoretse ariko wabikoze uburyo ntashaka.
Bityo rero tuzirikane ko kuba tugira umumaro mu bantu ntibivuze ko tuba dukora ubushake bw’Imana. Abantu bapimira umusaruro mubyagezweho ariko Imana igapimira umusaruro mu inzira ibyo byagezweho byanyuzemo. Ku mana igifite icyo kimaze si umusaruro ahubwo ni inzira uwo musaruro wanyuzemo.
Umusozo
Imana yahaye intego abigisha yo kwigisha ibyanditswe byera uko biri, ariko muri ino minsi usanga abigishwa bameze nk’abana babyarwa maze bakirera aho kurerwa n’ababyeyi. Twibukiranye ko umwana wirera aba afite ibyago byinshi byo kurya ibyo abonye harimo n’umwanda, bityo wowe usoma ino inkuru Imana irakwibutsa ko hari abo yaguhaye kurera kandi ugomba kubaha ibyanditswe muri Bibiliya kuruta kubaha ibyo wowe uzi ku giti cyawe.
Dukomeze kuzirikana kandi ko kuba abantu badushima bitangana no kuba ijuru ridushima, bityo rero twe gushukwa no gushimwa n’abantu nkuko abafarisayi bagenzaga (Yohana 12:43) ngo twibagirwe kumenya niba ijuru ridushima kuko bigorana cyane kwizera Imana kandi umaranira gushimwa n’abantu nkuko ibyanditswe byera bigira biti: “Mbese mwabasha mute kwizera kandi mumaranira gushimwa n’abantu, mu cyimbo cyo gushaka ishimwe riva ku Mana ubwayo? (Yohana 5:44).