Urwandiko rwandikiwe umuryango igice cya mbere: habonetse umugabo wabyaye abazwe.

Byashoboka ko ari ubwa mbere wumvise umugabo wabyaye abazwe, yewe birumvikana ko adashobora kubyara atatwise (ubwo yabanje gutwita). Ukuri kw’ibyanditswe byera ni uko umugabo Imana yamuremye mu buryo adashobora gutwita no konsa uwo yabyaye kuko hari ibice by’umubiri adafite byatuma adatwita cyangwa ngo yonse uwo yabyaye. By’umwihariko muribyo harimo inda ibyara (uterus), amabere yo konsa, ndetse n’igitsina gore, kuko umugabo aremwe mu buryo atanga (sender), umugore akaremwa mu buryo yakira (receiver).

None niba umugabo yararemwe mu buryo atabyara, yabyaye abazwe ate?

Sinifuza yuko ino nkuru yaza gutuma haribyo tutumva, kuko Imana atari iy’umuvurungano ahubwo ari iy’amahoro “God isn’t author of confusion but of peace” (1 Abakorinto 13:33). Ahubwo ndifuza yuko twaza kungukiramo icyo nahawe kumenya n’Umwami Mana, kandi ntize kuba inkuru maramatsiko ahubwo ibe umuyoboro wo kumenya ubushake bw’Imana.

Uwiteka Imana isinziriza uwo muntu ubuticura arasinzira, imukuramo urubavu rumwe ihasubiza inyama²¹, urwo rubavu Uwiteka Imana yakuye muri uwo muntu, iruhindura umugore imushyira uwo muntu.²² (Itangiriro 2:21-22).

Ndaza kwifashisha imvugo y’ubuvuzi (medical language) kugirango  twumve neza ino nkuru. Byashoboka yuko ino nkuru y’iremwa rya Eva wayisomye ariko reka tuyishyire kuri mikorosikope (microscope) kugirango tuyumve. Imana yasinzirije Adamu, muyandi magambo yamuteye ikinya (anaesthesia), nyuma Bibiliya yatubwiye ko yakuye muri Adamu urubavu iruhindura umugore. Muyandi magambo nyuma yo kumutera ikinya, yaramubaze (surgery) ikuramo Eva.  Nyuma y’ibi sinatinya kuvuga ko, Imana ari umuremyi n’umuganga mwiza ndetse rwose Adamu yabyaye abazwe.

Ese kuba Eva yaravuye muri Adamu biha irihe somo umuryango?

Muri iki kinyejana hari amakimbirane ndetse n’ibiganiro mpaka kubijyanye n’uburinganire, ubwuzuzanye, ndetse n’ubukuru hagati y’umugabo n’umugore. Aho bamwe bashinze imiryango ishyigikira kuba abagore badakeneye abagabo kugirango babeho (Feminist), ndetse n’ibindi biteza abagore imbere (Women emancipation association).

Umugabo ni umutwe w’umugore we (Abefeso 5:23) kandi aremanwe icyubahiro. Umugore ni umufasha w’umugabo (Intangiriro 2:18) ariko kuba umugabo aremanywe icyubahiro ntibimuha uburenganzira bwo gukoresha icyo cyubahiro ngo abikubitishe umugore ahubwo akwiriye kubikoresha ashyira hejuru umugore we. Niyo mpamvu ingo zimwe na zimwe zisenyuka kubera kutamenya iri hame ryo gukunda no guha agaciro umugore nkuko Kristo akunda kandi agakoresha icyubahiro cye mu gushyira itorero hejuru aho kuripyinagaza.

Ese kuba Eva yarakuwe muri Adamu byashushanyaga iki?

Kuba Eva yarakuwe muri Adamu ntibiduha isomo ku muryango gusa (morals) ahubwo hari icyo byashushanyaga ku Itorero. Adamu yari umugabo, yashushanyaga Kristo (Abefeso 5:23) kandi Eva yari umugore washushanyaga Itorero (2 Abakorinto 11:2). Kuba Eva yarakuwe mu rubavu rwa Adamu byashushanyaga ko Itorero (Umugore) azava/azavuka mu rubavu rwa Yesu (Umugabo). Itorero ryari kuzava/ryavuye mu maraso Yesu yavuye aturutse murubavu rwe kubwo kwizera kuko ni we waducunguje amaraso ye ngo tubone kubabarirwa ibyaha byacu (Abakolosayi 1:14).

Ibyo gutahana/kuzirikana:

• Imana ni umuremyi, umuvuzi (surgeon and anaesthetists);
• Umugore yavuye mu mugabo nk’ikimenyetso cy’uko umugore akwiye kugandukira umugabo, umugabo nawe agakoresha iryo shema muguha ishema umugore we;
• Adamu ariwe mugabo yashushanyaga Yesu Kristo naho Eva ariwe mugore yashushanyaga Itorero;
• Kuba Eva yaravuye mu rubavu rwa Adamu, byashushanyaga ko Itorero rizava mu bazizera amaraso azava mu rubavu rwa Yesu.