Urwandiko ku isanamitima igice cya kabiri: Yaramvuze kandi yarambabaje ntabwo nzamubabarira!

Birashoboka  ko wowe uri gusoma iyi  nkuru waba waravuze umuntu runaka bikamubabaza, yewe byashoboka ko nibeshye wenda nawe bakuvuze bikakubabaza! Ese nyuma yo kuvugwa; wenda ubeshyerwa cyangwa bakuvuga ukuri wiyumvise gute? Birashoboka ko nzamuye amarangamutima yari yarasinziriye muri wowe y’ibyakubayeho ariko ihangane!

Umuntu avuga undi ku mpamvu ebyiri z’ingenzi, iya mbere ni ukugirango aruhuke iya kabiri ni ukugirango amwangishe abandi. Abahanga muby’imitekerereze n’imyitwarire ya muntu bavuga ko mbere yuko umuntu aryama cyangwa atora agatotsi ibitekerezo bye bitekereza cyane k’umuntu wamubabaje cyangwa kuwo akunda! Ese wowe utekereza kuri inde mbere yo gusinzira? Byashoboka ko iki kibazo ucyibajijwe nk’umukristo wasubiza ko utekereza Yesu. Ese nibyo koko? Cyangwa nawe utekereza uwaguhemukiye?

Nkuko nabivuze haruguru, umuntu avuga undi kugirango aruhuke cyangwa amwangishe abandi. Nk’umufashamyumvire mu by’isanamitima nagiye nakira abantu batandukanye bavuga ukuntu abantu bagiye babavuga cyangwa bakabahemukira bikababaza ariko muri bo  abenshi bavugaga batagamije kubangisha abandi ahubwo bagamije gukira ibikomere batewe ariko hari n’abandi bavuga bagenzi babo bagamije kubangisha abandi! Ese wavuze mugenzi wawe  ngo uruhuke cyangwa wamuvuze ugamije gukurura urwango?

Mu minsi micye ishize nabwiye mugenzi wanjye ko yambabaje,  ansubiza ko yumva nta mutima umucira urubanza bityo atari ngombwa ko yansaba imbabazi! Ese nawe niko  ubyumva! Sinishimiye igisubizo yampaye ahubwo nafashe umwanya wo gusenga kugirango mbohoke, kubera ko kubabarira ntabwo bibohora uwakojeshe gusa ahubwo bibohora n’uwakosherejwe, nkuko umwanditsi Lewis B. Smedes yavuze ko kubabarira ari ukubohora imbohe maze ukamenya ko iyo mbohe yari wowe (To forgive is to set a prisoner free and discover that the prisoner was you). Ndahamya ko benshi mubagifite umutima ukomeretse si uko batasabwe imbabazi ahubwo ni uko batarababarira!

Ubwo nasengaga ngo Imana imbohore umutima kubw’umubabaro natewe na mugenzi wanjye, niyumvisemo igitekerezo, gishobora kuba cyari cyiyobowe n’Imana cyangwa cyari igitekerezo cyanjye bwite ariko icyo nzi ni uko nagihawe ndi gusenga, icyo gitekerezo ni iki: “NTAGO IKINTU CYOSE KIBA IKOSA CYANGWA ICYAHA KUKO WAGIZE UMUTIMA UGUCIRA URUBANZA NYUMA YO KUGIKORA.” Ese nawe iyo umutima utagucira urubanza  ntusaba imbabazi? Ubwo nahabwaga iki gitekerezo nibutse amagambo umwigisha yigeze kutwigisha muri 2019 atubwira ko umuntu iyo agendera mu mwijima cyane, umwijima ugeraho ukamuhindukira umucyo.. kandi nongeye guhabwa ko kutagira umutima ugucira urubanza ari amayeri y’umwanzi satani yazanye ngo akomeze urwango mubizera kuko badatera intambwe yo gusaba imbabazi abo bahemukiye kubera ko baba bibwira bati: “Nta mutima uncira urubanza!”

Byashoboka ko wowe uri gusoma yi  nkuru ugifite intego mu mutima wawe yo kutababarira uwaguhemukiye, ariko inabi Yosefu yagiriwe, Imana yayihinduye ineza (Itangiriro 42:51), none inabi Yesu yagiriwe siyo yahaye abamwizera umudendezo? (Yesaya 53:5)! Birashoboka  ko wavuga ko Yesu yari Imana ariko ntiwirengagize ibyanditswe byera ko bivuga ko tugomba kumwigana nk’abana bakundwa (Abefeso 5:1)!

Ubuhamya bwanjye

Tugana ku musozo, ndibuka umunsi umwe muri 2019 hari mugenzi wanjye narakariye kuko yari yishe igihe twahanye, twagendanye urugendo rw’amasaha arenga atatu ntamuvugisha turinda tugera aho twajyaga, nyuma yarampamagaye ambwirako yari yanzaniye impano nziza ariko kuko nanze kumuvugisha kandi  nkagaragara ku maso nk’uwamurakariye yahisemo kuyigumanira! Icyo gihe narihannye kandi ndigaya kubera ko kutababarira byatumye mbura impano! Ndetse ibi byavuzwe n’umwanditsi Bernard Meltzer ko iyo ubabariye uba uhinduye ahahise hawe ariko uhinduye n’ahazaza hawe (When you forgive, you in no way change the past—but you sure do change the future.” – Bernard Meltzer).

Ese nawe ntiwaba umeze nkabo Yeremiya yavuze ati “umuntu wese avugana amahoro na mugenzi we ku rurimi, ariko mu mutima we amuciriye igico” (Yeremiya 9:7B). Niba hari uwo ukirakariye mu mutima babarira nkuko nawe wababariwe, kuko imbabazi zuzuye zishoboka muri Yesu!

Wifuza gufashwa murugendo rwo gukira ibikomere saba gahunda ukanze hano!