Urwandiko rwandikiwe ab’itorero igice cya cumi na Gatanu: Gucyenyuka si ugupfa ukiri mutoya ahubwo ni ugupfa udakoze icyo Imana yakuremeye.

Byamaze kumenyerwa. Iyo unyuze ahantu ukumva bapfushije umuntu kenshi ab’umuryango barababara bamwe bakihutira kumenya icyo yasize avuze bwanyuma, kugeza no mubuhamya bwa nyuma buri wese umuturanyi n’inshuti aba afite amatsiko yo kumenya ati yavuze iki bwa nyuma? Mbese rwavuye he? Rwaremwe nande? Yaruremeye iki? Benshi bararwanga kuko rwabateje agahinda, ariko abandi barugize inshuti kuko arirwo ruzabambutsa rukabageza aho badapfa. Reka nanjye mvuge nti urutinya ni uwanga kujya aheza cyangwa ahabi bitewe n’umwami yakoreye, kandi ko uwo rutwaye ntababara ahubwo hababara abo asize. Urutavuye ku Mana ruragatsindwa (urupfu).

Mbese urupfu rwavuye hehe?

Ushobora kuba nawe waribajije iki kibazo cyangwa ukaba ukibajije kuko ncyanditse hano. Abahanga batandukanye bagiye babivugaho, hari n’abashumba batandukanye bagiye bavuga yuko rwaremwe n’Imana ariko uyu munsi ndaza kugaruka kucyo ibyanditswe byera bibivugaho.

Ariko igiti cy’ubwenge bumenyesha icyiza n’ikibi ntuzakiryeho, kuko umunsi wakiriyeho no gupfa uzapfa (Itangiriro 2:17).” Reka tuzirikane aya magambo akurikira.

• Imana niyo ya mbere yavuze ijambo urupfu;
• Imana yavuze ijambo urupfu, umuntu atarakora icyaha;
• Ubwo niba Imana yaravuze ijambo urupfu, umuntu atarakora icyaha, bivuzeko urupfu rwabayeho mbere yuko icyaha cyibaho/gikorwa.
• Niba Imana yaravuze bwa mbere ijambo urupfu; ubwo urupfu rwaremwe nande?

Nyakwigendera Dogiteri Mayirizi Munore (Dr. Myles Munroe) mu mahugurwa nyungura bumenyi (conference) yakoze yitwa Kuvuka no gupfa ku rupfu (The birth and death of death) yavuze ko urupfu rwaremwe n’Imana ariko irurema nta mbaraga rufite twabyita ko ruri netere (neutral). Yakomeje avuga ko Imana imaze kurema urupfu yarugereranya nk’intare ariko idafite amenyo n’inzara, iteye ubwoba ariko ntiyakurya cyangwa ngo ikunoshe. Reka nanjye nongereho ati, ni nkuruyuki rudafite urubori. Urupfu nta mbaraga rufite ahubwo ruhabwa imbaraga n’icyaha.

Ariko nanone niba koko ikiremwa cyose kiba gifite isoko mu muremyi, byaba bivuzeko Imana muriyo ifite urupfu, urupfu narwo rukagira ubumana? Yewe sinifuza ko ino yaduteza umuvurungano kuko byose tutamenya si ngombwa kubimenya kuko ibihishwe ni iby’Uwiteka Imana yacu, ariko ibyahishuwe ni ibyacu n’urubyaro rwacu iteka (Gutegeka kwa Kabiri 29:28), bityo iby’Imana yaduhaye ku menya ni uko yavuze urupfu mbere y’icyaha ariko itashimye kutubwira aho rwaturutse/rwaremewe nubwo hari abantu babivuzeho ko ariyo yaruremye. Kumenya aho urupfu rwakomotse ni ingenzi ariko si ishingiro ryo kubona ubugingo.

Kubizera urupfu ni inshuti yacu kuko ruzatwinjiza mu byiringiro biheruka dutegereje aribyo ubugingo buhoraho naho kubatizera/abapagani urupfu ni umwanzi kuko ruzabinjiza mu ihaniro ry’iteka aho urunyo rwaho rudapfa, kandi n’umuriro ntuzime (Mariko 9:44).

Gucyenyuka si ugupfa uri mutoya ahubwo ni ugupfa udakoze icyo waremewe gukora

Ndiho kugira ngo menye Imana nyimenyeshe n’abandi, ndiho kugirango nubahe Imana nanayubahishe, ndiho kugirango nkore iby’Imana yandemeye maze nyuma ntahe iwacu. Hari umwigisha nigeze kumva ahangara kuvuga ko Imana yavuze ko imyaka umuntu atarenza ari 120 ko nabayirengeje aba ari ukubeshya imyaka kuko byaba bivuga ukubiri n’ibyanditswe byera. Nabyibajijeho iminsi nyuma menya ko Imana yavuze imyaka mpuzandengo (average age) bityo bishoboka no kuyirenza rwose

Gupfa uri mutoya cyangwa ufite imyaka micyeya si ugukenyuka cyangwa ikibazo. Urugero: Mu cyizamini cya Leta akenshi bagiha amasaha abiri 2 angana n’iminota ijana na makumyabiri ariko umunyeshuri uba uri mukizamini ntabwo aba ategetswe gukora ikizamini iyo minota yose. Hari abi nkwakuzi baba barasobanukiwe neza isomo kuburyo bagikora iminota 40, 50, 60, abandi 70 gutyo gutyo, kimwe nuko hari uwo iminota irangira atararangiza gukora ikizamini. Iki cyigereranyo ntanze kimeze nk’ubuzima bwacu mu isi. Hari uza ku Isi yasobanukirwa icyo yaremewe akagikora vuba mu myaka mirongo itatu, undi mirongo ine, undi mirongo inani gutyo gutyo. None niba ndangije gukora ikizamini mbere ninde wo kudasohoka ngo ntahe iwacu? Ese niba ndangije gukora icyo naremewe ninde wo kudataha iwacu, twibukiranye ko iwabo w’umuntu ari yatashye atari aho yiriwe.

Umwana wanga gutaha iwabo ni ikirara, kandi So/Data (Imana) aguhamagaye ukanga kwitaba wakwitwa umunyagasuzuguro. Kubwibyo rero, niba urangije umurimo wawe ugahamagarwa itaba kuko kunyura murupfu bizakugeza kwa Data/Papa wawe (Gupfa uri muyoya si ugukenyuka ahubwo ni gukenyuka ni ugupfa udakoze icyo waremewe).

Isomo n’umusozo

Niba urangije gukora umukoro wawe mu Isi ku myaka mirongo itatu, itaba So. Wishaka ku mwaka agahushya kuko abakamwatse akakabaha bagakoresheje nabi (Urugero: Umwami Hezekiya). Kuko ntazi niba imyaka nakwakamo agahushya (inyongezo) nayikoramo neza, niyo mpamvu n’impamagara nzitaha kuko nzaba njya aheza kuruta aho ndi (aya magambo nyavuze nk’igitekerezo cyanjye ariko cyuzuzanya n’ibyanditswe byera). Benshi iyo umuntu apfuye bavuga ko yaragikenewe. Ese ninde wamenya ikibumbano kuruta umubumbyi? Ninde mwamenya ikiremwa kuruta umuremyi? Imana iba igucyuye, iba ibona utagikenewe kuko wasoje umukoro wawe. Abarira kubera kubura ababo nimuhumure tuzababona, kandi umuremyi akora icyo ashatse kubw’inyungu z’ubwami bwe. Wifuza gufashwa no kwiga bishingiye ku ijambo ry’Imana n’uburyo bw’imaragahinda ku mubabaro wawe n’ibikomere watwandikira tukaguhuza nuwagufasha.